Branch Executive Committee Vawi 9-na neih a ni
The Vengsang 21st AugustVengsang Branch YMA Executive Committee Vawi 9-na Dt. 16.8.2011 (Thawhleh) zan khan YMA Hall Committee room-ah neih a ni a, Committee hi President Pu Hmingthansang’n kaihruaiin Commitee Member 18 kalin an rorel tlangpui mipui ten kan hriat awm te.
Rorel 1-na : Lehkha lut hrang hrang :
a) Thlamual Sub-Commitee :
Vengsang Branch YMA Thlanmual Sub-Committee Secretary Pu David Rualthankhuma hnen atanga an lehkha dawn chu ngaihtuahin heng:
1) Kan thlanmual neih pahnih ah te hian Thlanmual hraittirna dan te Sign Board a tar ni rawh se.
2) Kan thlanmual te hi ahnim em avangin hnim hlo a kah ni rawh se.
3) Thlanmual a kan hmanlai bawngtuthlawh te hi a chhiat avang leh atlem tak avangin Bawngtuthlawh thar pali leh fawng lei ni rawh se.
4) Thlan vung dawlna thir pipe PHE Department ah dil ni rawh se.
Khing te khi hmalak theih turin Committee chuan a pawm a. Tin, ‘Thlanmual a hman turin tui kan mamawh dahna turin Syntex lei ni rawh se’ tih erawhchu tundinhmunah kan tlin hrih loh ah ngaiin tih hrih loh mai nise an ti a. Tin, Thlanmual a hman turin lung trip khat dah leh nise an ti a, Sum leh tuldang buaipui ngai chu thlanmual sub-committee kutah an dah a ni.
b) Manager LPG Mizofed Champhai :
Pu C. Ngaihzamvela Manager LPG Mizofed, Champhai in kan veng chhung atang Gas Connection neilo mi panga Dt. 18.8.2011 ral hmaa thehlut tura a tih angin hetiang hian ruahmanna siam ani. Gas Connection la neilo Khulhthei ngei tur te chu Dt.17.8.2011 zingkarah kohkhawma atul anga hmalak mai nise an ti.
c) Central YMA: Pu Lalbiakzuala General Secretary CYMA hnen atanga lehkha an dawn hrang hrang ngaituah lehin hengte hi an thlen a ni ang
i) General Conference 2011 Kolasib a neih turah YMA Member boral sun tur leh Hruaitu Chawimawina dawng thei tur an awm anih chuan Branch OB ten lo buaipui mai se an ti a.
ii) Central YMA leh Mizoram Athletics Association tangkawp ten Marathon Race leh Inter Branch YMA Table Tennis Tournament an buatsaih turah ahranpa a hma la lovin Branch Chanchinbu ah akimchang chhuah phawt ni se an ti.
iii) General Conference 2010 Lunglei a neih an rorel zinga mi ‘Kan ram thing chereu ven nan Kuang atan thingphel hmang tlem turin leh remchang dang hmang zawk turin Central YMA in hmala rawh se’ tih Central YMA in hmalakna an siam chu ngaihtuahin OB ten lo zir chiang se Committee leh ah pharh ni mai se
Rorel 2-na: Chhiatni Fund chungchang:
Chhiatni Fund chungchang sawiho in tun hnaia Chhiatni Fund Job Card nei zawng zawngte atanga khawn Job Card nei lo te khawn dan tur chungchang sawiho in Sum enkawltu ten chhiatni Fund pe list lo siam se Section tin ten mahni section ah lo khawn in September 10th 2011 hmaa thehluh leh nise an ti bawk.
Rorel 3-na : Grape huan hnatlang chungchang :
Grape huan tifaia hnatlang neih chungchang sawiho a ni a hun remchang hmasa berah hnatlan ni se an ti a, ahun chu Branch OB kutah an dah.
Rorel 4-na : Mitthi Lumen zana sawhchiar siam leh siam loh chungchang:
Vengchhunga mitthi awma lumen zana sawhchiar siam leh siam loh chungchang sawi ho a ni a, thu leh awm hma chu sawhchiar siam hi enchhinna an neih tawh atanga alan danin siam tawh hrih loh mai nise.
Rorel 5-na : Thlanmual mitthi hming ziahna chungchang:
Thlanmual Mitthi hming ziahna chungchang an sawiho a tun aia tha leh mawi deuh zawka siam tawh thin nise an ti.
Branch Activities
Branch hnatlang:
Dt. 19.8.2011 (zirtawp) zingkar khan Grape huan tifaia hnatlang neih a ni a, member 15 vel thawk chhuakin an la zo lo deuh a, Nimin Inrinni zingkarah khan chhunzawm leh niin member 7 an thawkchhuak. Branch hnatlang hi Information a au a nih loh avang in mi tam zawkin kan lo mang nghilh niin a lang a, naktuk Thawhtan zingkar hnatlang ah chuan atam thei ang ber thawhchhuah tum tur a ni.
Branch thuthleng:
Vengsang Branch YMA in Thuthleng kan neih te atlem tak telh telh avangin pawl emaw chhungkua emaw YMA thuthleng lo kawl kan awm anih chuan khawngaihin tunkar chhung ngei hian YMA Hall-ah dah tura ngen kan ni e.
Section News
Section tin ten Cencus update leh siam rem ngaite ennawn hna an thawk mek. Kan vengin chhiattawhna kan neih nual avangin hmasakna tur tam tak chu hmachhawp mek a la ni.
Tualchhung
VC NewsRemchang hmasa ah chhuat nawhna siama hnatlang neih tur ani a,member te lo inring tur in kan in hriattir e
Weightlifting coaching
Pu Ramdinthara V Sec. hnenah Weigh tlifting coaching lama tui te tan coaching trainning a dil theih. Dil turte chuan naktuk thawtana Aizawl a kal nghal a ngaih tawh avangin vawiin Pathianni ah ngei in report vek tur a ni. Kalna leh haw lehna (TA / DA) pek an ni ang a, amaherawh chu mahni pawisa hman hmasak phawt a ngai dawn thung a ni.
Hriattirna
Jamadr thlanmual hnuai YMA Grape huanah tumahin thlai chin tawh loh tur.Tuna chinlai hi chu an seng thei ang a, a bak ching leh an awm chuan paihsak zel an ni tawh ang.
Vengsang Sporting Club
Kan hma lawk thla thar hian CDHA tournament a awm dawn a,Hockey players zawng zawng te thahnem ngai taka practice tan tawh tur a ni.
In luah chung chang
Misual, rukru leh ruihtheihthil a kan lo fihlim lehzual nan Veng chhunga In luah tur nei ten In luahtu tur chungchangah fimkhur theuh turin kan in ngen a, a bikin hnam dang mi luah tir lo tur leh YMA leh V.C pem lehkha mumal tak leh belhchian dawl tak nei lo phei chu luah tir lo turin kan in hriattir nawn leh a ni.
LAWMTHU SAWINA
Tun PYKKA champhai District VC in elna kan neih zawh takah kan veivah nan a motor min tum sak tu mi tlawmngai Upa Thangkhuma T.sec te chungah kan lawm em em a,Veng tana an in phalna leh an in pek naah hian lawmthu kan sawi takmeuh a ni.Sd/-
Rambuatsaiha
Secretary
VC-I Vengsang
HRIATTIRNA PAWIMAWH
1) Central YMA leh Mizoram Athletics tangkawp ten Marathon Race(Mipa leh Hmechhe tan) Dt. 23.9.2011 hian Aizawlah a buatsaih dawn a Vengsang Branch YMA Member he Marathon Race a tlan duh te chu August thla chhung ngeiin Branch OB te hnenah in report tur a ni ang.2) Marathon Race tlan thui zawng tur hi 21 Km a ni ang.
3) Lawmman (Cash Prize) mimal tlan ten an dawng ang.
4) Central YMA 4th Inter Branch YMA Table Tennis Tournament Dt. 7th - 10th Sept. 2011 chhung hian Kulikawn Indoor Stadium ah neih a ni dawn a, Vengsang Branch YMA atanga mipa leh hmeichhe tel duhte chu August thla chhung ngeiin Branch OB te hnenah in report tur a ni ang.
Sd/- Sd/-
(Hmingthansanga) (C.LALMUANPUIA)
President Secretary
Vengsang Branch YMA 2011
AWMLAIA THI TIH HI -CYMA Website
Tun hnai mai atang khan mitthi thih chhan ziah naah hian “Awmlai” tih an hmang ta fova,adik chiah lem si lova,chin zui zel loh atan atha khawp mai,thihchhan sawina kawnga Awmlai tih in a kawh chu Sarthi leh raicheh ni lo,natna danga thi hi ani.natna chi hrang hrang a awma,Ngawr te,khawsik te,awmna te lungna te cancer te etc. tamtak a awm.Chung natna avanga thi zawng zawng chu “AWMLAI” a thi an ni vek. “AWMLAI” tihhi hman kan duh tlat a nih chuan Sarthi leh Raicheh ni lova thi zawng zawng te thihchhan ziahnaah hian AWMLAI tih dah vek mai tur a ni,chu lah chu a tih chi hlek si loh.
Thihchhan ziaktu ten tih lan kan tum leh alen pui tu ten hriat kan duh chu natna zinga engvang ber in nge athih tih kha ani a,AWMLAI tih ngawt chuan a chiang thei lo.sarthi leh raicheh anilo tih chiah ati chiang.Chuvangin upa deuh leh tar natna bik chiangfak neilo te thih changa AWMLAI tih ngawt bik hi a dik thei lo.naupang deuh in tar thi tihna emaw an tih phah ahlauhawm hle ani.mizo tawng tih khawlohna ani palh hlauh dah ang e.
LAWMTHU SAWINA
Kan Nu / Kan pi Vaineli Chhakchhuak (91) in Dt 9.8.2011 zan dar 7:30 a chatuan ram min pansanna ah khawtlang mipui, YMA member leh Nula leh Tlangval ten kan mualphona tur tam takah min hliahkhuhna avangin lawmthu kan sawi mawlh mawlh a, aruang tlaivarpui ngai a nih avangin tlawmngai taka min tlaivarpuitute chuangah lawmthu kan sawi tak meuh a. Tin, kan khawhar min hnem tura min riahpuitu tlangval te chungah lawmthu kan sawi bawk a, min lainattute zawng zawng chungah pawh Pathian hmingin lawmthu kan sawi mawlh mawlh a ni e.In khawngaihna dawngtu
K. Doliana leh a chhungte
Champhai; Vengsang
Keimahni
Kan chanchinbu herna CK Press ten thil to chho zel avangin an Press a chanchinbu lut zawng zawngte tlem te te in a her man an ti sang. Hetih rual hian Power supply awmloh pawh a phal taka Generator min hman tir thin a, a neitu Pu Sangtea leh Nula LT-i te chungah lawmthu kan sawi.
Central YMA Thuchhuak
Mizo hming hawha hnamdang sumdawngte kohkhawm an ni.Ni 10.8.2011 dar 1:00 PM khan Central YMA Hall-ah Hnamdang Mizo hming hawha Dan lova sumdawngte leh anmahni Sponsor tute kohkhawm an ni. Heng kohkhawmte hi ni 6.8.2011 (Inrinni)-a Central YMA hruaitu ten an dawra kala an endikte an ni a, mi 125 an lo kal khawm a ni. YMA General Conference 2010, Lungleia neih thurel "Mizo hming hawha dan lova hnamdang sumdawngte titawp turin Central YMA-in hma la rawh se" a tih bawhzuina a ni a, Thalai Sorkar hna thawk lo ten sumdawnna kawng an zawh theih nan leh Mizote Economics-a chimrala kan awm loh nana hmalakna a ni a, Mizo mipui zawng zawngte hnamdang sumdawngte mahni hming hawhtir lo tur leh a lo ti mekte pawh August 2011 thla chhung ngeia titawp turin an ngen a, tin, a bawhzuitu tur pawl pawh insiamin a tul anga hmalak zel CEC chuan a rel a ni.
YMA General Conference 2010-in a rel bawhzuiin, Central YMA chuan Mizo hming hawha hnamdang sumdawngte dapchhuah hna a thawk mek a, hetiang anga sumdawnna kalpui mek hi tam tak an awm a ni. Sum leh pai tlemte vanga mahni hming hawh tir a, hnamdang sumdawn tir chu dan kalh a nih ziate, ram leh hnam hralhna anih ziate hre turin Central YMA chuan mitinte a ngen a, chuvangin hetiang anga sumdawnna kalpui thinte chu August 2011 ral hma ngeia titawp turin a ngenin a hriattir a, Central YMA chuan a hlawhtlin leh tlin loh a vil zui zel dawn a ni.
Hemi rual hian ILP-a hnathawh tur tarlan anga hna thawk lova hnamdang awmte zawnchhuah hna pawh a thawk chho zel dawn a ni.
11th Central Executive Committee Meting
Ni 5th August, 2011 chawhnu dar 3:00 khan Central YMA Committee Room-ah 11th CEC Meeting neih a ni. He meeting hi Pu Lal Chungnunga,President-in a kaihruai a, member 45 an tel. He meeting-ah hian Pu Lalbiakzuala, General Secretary chuan CEC hmasa leh tun inkara hmalakna report a pe. ILP leh Electoral Roll fimkhur taka kalpui a nih theih nana hma la tura District tin DC leh SP te ngenna siam a nih thute, Mizo hming hawha dan lova hnamdang sumdawngte zawnchuah tura ruahmanna awm chu meeting a hriattir a, ni 6th August, 2011 hian area 7 a in thenin, mahni area theuhva hma lak nise tih a ni. Tin, Assembly House-a kan ram roreltu ten Foreigner te thlavang hauhzawnga thu an sawi avanga Central YMA-in thuchhuah kan siam chu CEC Meeting hian a pawmpui. 10th CM Running Trophy 2011 neih leh tum a ni a, a hun chungchang chu Sorkar thneitute nen la ruahman tur ani.
66th YMA General Conference-ah Khuallian neih tha ti a, Khuallian atan Pu R.Lalzirliana, Home minister chu sawm nise tih a ni. Detailed Programme Committee te ruahmanna siam chu tha kan ti a, kan sawihona hre rengin Programme siam nise tih a ni.
Ni 27th June - 10th July, 2011 chhunga Krista Hnungzuitu Tawngtai Bethel Camping Centre-a Camping kan neih zawh tak chu Followup Programme neih pui leh nise tih a ni a, a tul angin Kumpuan Sub-Comittee ten ruahmanna lo siam se tih a ni.
Meeting tluang takin tlai dar 5:30 ah zo
Ni 6th August, 2011 chhun dar 12:00 khan Aizawl khawpui chhunga hnamdang Mizo hming hawha dan lova sumdawngte enfiah a ni a, Gruop 7 a inthenin Khatla, Sikulpuikawn - Republic Road, Tuikual - Vaivakawn Road, Dawrpui Area, Zarkawt Area, Chanmari Area leh Bawngkawn - Zemabawk ah CEC te in sem darhin neih a ni a, hetah hian Permit lem, Vai leh Vai insponsor leh Mahni leh mahni in sponsor tam tak hriat chhuah a ni. Hnamdang Mizo hming hawha sumdawngte hi ni 10th August, 2011 hian Central YMA Office-ah kohkhawm an ni ang.
EDITORIAL
MAHNI INBUMNA?Kum 10 kalta ah khan eiruk hi suala ngai chungin lo ti ta ang ni la, Sual ngawih ngawihin i inhriat phah ang. Sim lovin tun thlengin chhunzawm zel la, eiruk chu sualah pawh ngai tawh lovin tihphung pakhatah i ngai ang a, suala inhriatna pawh i nei tawh dawn lo tihna a ni. Eiruk sualna chu a ngai reng a ni a, kum 10 hnuah thil tha a ni thei chuang lo. Mahse, i ngaihdan zawk kha a inthlak tak avangin suala inhre thin khan sual lovah i inngai ta mai tihna a ni. Chutiang mi chuan, sual sim si lovin sual tehna an thlak a, sual dan ngai renga sual chungin kum 10 hnuah mifel niin a inhre ta tlat mai a nih chu!
Mi thenkhat chu, fel tak tak miah si lovin, mi fel lem an chang thiam tial tial thei tlat! Zing thawh tawngtai leh zan mut dawna tawngtai inkar zawng hian mi fel lem a chang ta ngat ngat mai a. Chhungrilah a fel tial tial miah lo, pawn lamah erawh chuan mi fel tihdan a entawn thiam tial tial a, a pawnlang hmutute chuan A va fel sawt em! an ti a. Chutia kum tamtak a beih hnu chuan, a lemchan chu amah chuan tak tak emaw a ti a, sual sim chuang miah si lo hian, mi fel tak tak emaw a inti mai thin. Chutiang mi chu pawn lamah hahdam tak angin lang mah se, chhungrilah a hah kumkhua ang a, mi fel lohna zawn ching tak a ni bawk ang. Chuvangin, mahni inbum ai chuan mahni inhriat a fing zawk. I inhriat danin i derthawng tial tial nge i ngelnghet tial tial? Taksa hriselna mai piah lamah, Pathian hriatnaah te, hringnun zinkawng chhenfakawmna hriatfiahna chungchangah te, i fiah tial tial nge i bo tial tial?
Kum khatah vawi khat tal he zawhna hi i inzawt ngai lo a nih chuan mahni dinhmun inhre chiang lo takin i hun tamtak i hmang dawn tihna a ni. A hlauhawmzia i ngaihtuah thiam em? Kan zin kawngah hian mahni car theuh khalhin hma lam panin kan tlan a. Kan oil leh tyre dinhmun te chu, kan zinchhuah tirha mi ang kha a ni thei tawh lo. A khat tawka endik a ngai a ni. Kan engine dinhmun hi mi dang min hriatsak tur a ni lo (driver rawih theih a ni si lo!) he car chhunga chuang chunga khalhtu, keimahni ngei hian Pathian rawn chingin a khát tawka kan endik a ngai a ni.
ENGLO HUANG
Kan hnung deuh mai ah khan Hnahlan nula lo zin a, ka leng rei thei fu ni..! Tun thlengin ka hmui hi a la vung deuh in ka hria.. Ropeka lo chuan engmah in hre ve si lo va le..- Lalmama (BA) Vawmbal bul
Ka zak ngai lo emaw ka tia, Mi, chawei ah kan sawm, kan theihnghilh, chaw kan lo ei tawh, chaw ei turin an lo kal si.........-Pu T. Rochungnunga. N. Sec
Sawi teh suh... Khawhar inaha ka phone a lo riii.. Hallo ti ta lo chuan, ring tawkin Halleluaih kan ti mai chuuu.......-Pi Darthangpuii T. Sec
Kei aia pa awm thei ni tur chuan beih fe a ngai ang..........-Pu Hmingtea, N. Sec Hospital
Nuthlawi nih ringawt chu anuam vak chuang lo. Lengchhuak dawn i la fa ten min kap tawh si a, Manun min tanpui teh..-Mapuii (Nuthlawi Havilder) V Sec.
Facebook ah ‘Saichalruma’ tiin ka in dah ngawt a, tuman min add duh lo mai ni lovin min accpet duh maih lo!- Valpuia K Sec.
Kei zawng Keifangtlang sawn ka lung min leh leh ta daih mai.....-Valtea (Baju) V Sec.
Post a Comment