Vengsang Branch YMA Executive Committee Vawi 12-na neih a ni.
The Vengsang 20th November.:Vengsang Branch YMA Executive Committee tun kum a Vawi 12-na chu Dt. 15.11.2011 (Tuesday) 6:30 PM khan YMA Hall Committee Room ah thutkhawm ani a, Committee hi Pu Hmingthansanga President Vengsang Branch YMA in kaihruaiin, Tv. K. Vanlalenkawla Committee member in hunserh hmangin Tv. F. Lalthanmawia Treasurer Vengsang Branch YMA in sum dinhmun tlangpui leh YMA General Conference 2011 Kolasib a hman zawh tak report tlangpui pe in, Committee Member 20 kalin an rorel tlangpui mipui ten kan hriat awm te
Rorel 1-na :
Vengsang Branch KTP ten Biak In kawn chei tumin Vengsang Branch YMA ah tanpuina an rawn dil a Rs. 1000 (Chang sangkhat) a tanpui nise an ti.
Rorel 2- na :
Sub-Hqrs YMA Champhai Kumpuan Sub-Committee in kum 2011 chhunga mahni branch huam chhunga zirna in hrang hranga Kumpuan ‘Khawtlang Nun Siamthat’ hmanga Awareness Campaign neih tur atih chu Branch OB ten lo ngaihtuah se a remchan dan angin hma la turin an ti bawk.
Rorel 3-na :
Kuang siam dan chungchang rel a ni in kuang siam nan hian thingphel a to leh avan tak avangin kuang siam nan hian Plyboard leh thingphel hman kawp tawh thin nise an ti.
Rorel 4-na :
YMA No lei dan tur chungchang relin YMA No hi tuna kan hmanlai hi thlak vek nise an ti a, no hi tuna kan hmanlai ang YMA No ang hi lei nise an ti bawk.
Rorel 5-na :
YMA Hall Committee Room chei dan tur sawiho a ni a Committee Room chhuat ah Floortile a chei/phah nise an ti a, a tul leh pawimawh chu Branch OB ten lo buaipui se an ti.
Central YMA News
Ni 14.11.2011-a Central YMA OB thukhawm chuan Pu Vanlalenga Sailo, Tlangnuam in Property Sub-Committee Secy , a chenna hmun a sawn dawn avanga a phatna chu pawmin a aiah Nl. Irene Lalruatkimi, Tlangnuam Branch chu Property Sub-Committee Secretary atan a ruat a, kum 2011-2012 chhung atan CEC Member a ni.Assam Rigiment (Mizo Tlangval) pathumte Garmura (Assam)-a Assam Police ten an lo sawi sak chu Central YMA chuan a dem takzet a, Central YMA chuan a demna thuchhuak a siam (Download theiha dah a ni)
Ni 16.11.2011 khan YMA General Conference thurel bawhzuina "Labour Law kan neih ang angte kenkawh kawngah Sorkar-in chak zawka hma la turin Central YMA-in ngen rawh se" a tih angin Labour Minister Pu Lalrinliana Sailo chu Central YMA OB ten a Office-ah an kawm.
Mizoram Governor-in NGO te lenga a sawm angin Ni 17.11.2011 khan Raj Bhawan Durbar Hall-ah NGO hruaitu te nen an inkawm a, Central YMA OB te pawh an tel a, ramngaw leh nungcha humhalh kawngah leh tuihna humhalh kawnga MA hmalakna ropui a tih thu Governor hian a lo sawi nghe nghe a ni. Tin, Halpuah, Naupang silai lem zawrh leh hallo tura mipuite ngenna Central YMA-in a ti chhuak.
BRANCH ACTIVITIES
OB Meeting :Dt. 17.11.2011 (Thursday) zan khan Pu C. Chalthanga te inah Branch OB inhmuhkhawmin Committee thu bawhzui ngai te leh tul dang te sawiin an thukhawm.
Thuthleng tur thingphel :
Branch Executive Committee in thuthleng a tlem tak avangin in thuthleng siam a rel angin tunah hian YMA thuthleng tur Teipui thing Selam ah zai tir mek a ni a, an zai zawh veleh va phurh angai dawna YMA Member te hnatlang turin lo inrin lawk tur a ni.
Kan Hall alun hle:
Tunlai hian kan YMA hall alun hle a Dt. 17 leh 18.11.2011 khan Serchhip Higher School Science zirlai 50 bawr velin riah nan an rawn hmang a, nizan Dt.19.11.2011 nimin atang khan tunkar chhung zawng T. Romana College zirlai ten an rawn hmang lehin, tunlai hian kan hall alunin hetiang ang hall hman theih kan nei hi Pathian malsawmna liau liau a ni.
Zin mek:
Pu Lalrinsanga Branch Fin. Secretary chu Aizawl lamah a thang mek. YMA No tur leh Committee Room chei na tur Floor tile te rawn hrechiang in, hun remchang hmasa berah lei tum a ni. Dam taka alo haw leh thuai kan beisei.
Vanapa Section :
Tun Nilaithawhtan (17.11.2011) khan Serchhip Higher School Science zirlaite Study tour leh chuan intihhliamna ni pah fawmin Rildil an rawn kal a, YMA hall an rawn thlan tlai hian Vanapa Sectionte Inhlawhna siam in eirawng an lo bawl sak a. He inhlawhna siam saktu leh sum thahnem tak petu Serchhip Higher School te chungah Vanapa Section chuan lawmthu a sawi mawlh mawlh a ni. Tin, remchang hmasa berah Section intih hlimna neih an tum bawk.
Tualchhung
Veng mipuite ngennaMizoram Sorkar chuan kum 2011 Krismas leh Kumthar 2012 vuakvetah Halpuah leh Halmawi zawrh leh hal a khap a. Halpuah leh Halmawite hi mihringte tana tangkaina nei lo, hriselna tichhe thei, a lo thlawna sum tam tak sen ralna a nih bawk avangin, Central YMA chuan mitinte Halpuah leh Halmawi zuar lo tur leh hal lo turin a ngen a, mahni theihna zawn theuhva hma lo la turin min ngen a ni. Tin, Silai lem a mu kahchhuah theih naupangin an hmang thin hi Central YMA chuan tha lo a ti bawk a, heng silai lem hi mi tam takin chhiat phah nan an hman tawh avangin, kan fate lei sak lo turin nu leh pate min ngen bawk.
AIDS / HIV inzirtirna
Nimin Inrinni (19.11.2011) khan Vengsang Presbyterian Kohhran hall-ah Conservative Seminar neih a ni. He Seminar ah hian YMA aiawh Vengsang VC leh kan venga Presbyterian Pastor bial Kohhran pathum (Hospital veng, Ramthar, Vengsang) atangin Kohhran Committee aiawh, KTP aiawh, Kohhran hmeichhia leh Pavalai aiawh te sawm an ni. He Seminar hi Dr. Sanghluna (Durtlang) leh a hote huiahawt a ni a, AIDS chungchang thu ngaihnawm leh bengvar thlak tak tak leh hriselna lamte ngaihthlak a ni. Tlai lamah Kohhran in chawhlui a buatsaih sak a, akal ten hlawk an in ti hle.
Shawl bo zawnna
Pathianni hmasa kalta khan zan inkhawm nana ken Shawl a rawng pawl-eng leh a hring tihbo palh a ni a, alo chhar chuan Pi Siami w/o Pu Sanglawma PHE Veng hnenah pe leh tura ngen i ni e. A tihbina lai chu an In inkar leh Ramthar Preby. Kohhran Biak In inkar ah a ni e.
I sim mawlh ang u
Politics hmang a Champhai nitin chanchinbu lama Veng hming lang zawnga SMS thawn hi Veng mulaphona a ni. Politics hi kan tui tur a ni, mahse a ruihchilh leh party dangte hêk zawng chuan om hram loh tur a ni.
SAWRKARIN ZAWLAIDI MAN A TI HNIAM LO
Champhai District Grape Growers` Assn. in Inrinni kalta a Zawlaidi siam chhuah sa grape chingtute hnena hralh an tum chu Champhai DC leh hotu dangte nena an inbiak hnuah an thulh a, November ni 17 thleng Sawrkar ngaihchan leh rih an sawi. Sawkarin Zawlaidi man a tihhniam duhloh lantirna`n Inrinni khan Grape Growers Assn. member thahnem tak TLangsama Grape tui sawngbawlna hmun ah an phungkhawma . Zawlaisi um lak chhuaha baa grape an lak sakte hnena Um khat Rs. 133 zela hralh an tum a. Police leh Excise Official ten Winery hi kharin an lo dang a. Champhai DC Vijay Kumar Bishuri leh SP Pu C. Lalthanmawia te an thlen hnuin Grape Growers Assn hruaitute nen an inbia a. District thuneitute chuan Excise Minister-in Zawlaisi man chungchangah inbiak leh nise a tih thu an hrilh hnuah an tin darh ta a ni. Grape Growers` Assn. hruaitute chuan tunkar ningani thleng sawrkar ngaihchan leh nise, an ti a. Thawhtanni hian Assn. hruaitu thenkhat sawrkar be turin an kal ang a, an kalna senso hi Champhai DC in a tum dawn a. Tunkar Ningani thlenga sawrkarin a chinfel loh chuan District thuneitute`n dang bik tawhlo se tiin thu an sawi ve niin
Grape chingtute President B. Remmawia chuan a sawi. An thutlukna te:
1. Zawlaidi rate hi Rs.133/- bottle a nih theih nan sorkar in a rate hi Dt.17.11.11 hma ngeiin min siam sak rawh se.
2. Kuthnathawk a grape chingtu ten kan grape atanga kan siamchhuah wine rate kan siam theih nan Mizoram Excise & Narcotics Wine Rules sorkarin min siamthat sak rawh se.
3. Zawlaidi aia alcohol sang zawk Myanmar atanga lokal Sozu (20.1% v/v) leh Haidi (16% v/v) leh beer chi hrang hrang leh zawlaidi lem nasa tak leh zalen taka hralh chhuah mek hi sorkar leh Kohhranin khuahkhirhin hma la rawh se.
Sub-Hqrs. YMA CHAMPHAI
Champhai Sub- Hqrs. YMA hnuaia Anti Drug Squad te chuan sap zu um puitling local zu leh BEDC thahnem tak an man. Nilai zan 16.11.20100 dar 10 vel New Champhaiah Local siam zu Rs. 700 man hu vel an man a, hemi hnu dar 10:30 vel khan an thudawn bawhzuiin Vaihmunah sap zu um puitling 163 an man leh bawk a, hengte hi Mc Dowell`s um 156 leh SP Black um te a ni a, McDowell`s hi almairah a dah niin SP Black hi ceiling chungah thuhruk a ni bawk. Zu an manna inah hian naupang chauh an awm avangin a neitu hriat chian a ni lova, tunah hian chhui zui mek a ni a, Nimin piah zing dar 5 vel khan Anti Drug Squad te hian Myanmar atanga hlawhfa in an rawn phurh sap zu um puitling 24 leh BEDC litre 42 an man leh bawk a, a neitu hi chhuizui mek a ni bawk. Kar liamta an an man zawng zawng hi hlutna chu Rs. 1,32,150 man hu vel a ni. Tin, Zirtawp ni khan Tlangrawtah Comt. neih a ni a, Internet-a news an dahluh ngailoh avangin karleh ah tihchhuah a ni ang.
Veng ‘BER’ thlanna
Kan Veng chhungah mi ‘aber’ kan tih SMS hmanga thlanna siam tum kha thlangtu mumal an awm dawn lo ni a alan avangin a hun chu tiam chin awm lova sawn hlat a ni. Tlawmngai leh mahni veng History pawh hre lo khawpin kan awm te a nih chuan in ennawn a hun takzet, khawtlangah kan in hmang lo hle tih a lang tlat mai. Tin, kan Veng rau rau ah pawh tlema hawisang chinte ngaihdan Facebook Vengsang ah pawh ngaihhlut a hlawh lemlo!! Kan thangtharte hmalam hun mawlh hi a veiawm. Thu leh hla chu thu hran, tun dinhmuna kan nule leh tlangvalte hawiher thlir hian tun atanga kum 7 hnu lamah chuan engang takin VENGSANG hi hruai tak ang maw???ENGLO HUANG
Kan chanchinbu buaisaihna a harsa lai ber chu ‘Englo huang’ hi a ni. A ngai in kah vak vak a ninawm rualin a ngai lo kah tur kan hre ve si lo. In thawh loh chuan a hranpa a ngaihtuah vak kan tum ta lo mai
- Editor
Editorial
HLUT-NA
Thil engkim mai hian hlutna an nei theuh a, hlu lo reng reng an awm lo tihna erawh a ni lo!Hluna reng reng nei lo ni awm tak,hlu lo mai pawh ni lova hnawksak zawk tlat an awm thin.Enge a chhan ni ta ang le?Hlutna nei theuh theuh hlu vek awm tak?A ni reng lah tak a,hlu vek sela chu he thu hi ziak lovin ka mu mai mai ang a, ka hahdamthlak zawk tur....tiraw?Hlutna hi mawinaah te, sum-paiah te, ropuinaah te, changkannaah te, thiamnaah te hian a awm ngawt lo va. A man tam tam (to to) hlu lah a ni na hek lo. Hlutna awmna chu nihnaah a ni. Thil reng reng hi a nih dan tur ang taka a nih hian a hlu a, a mawi a, a zahawm thin. Nihna chu mawh-phurhna hlenchhuahnaah a awm. A nih chuan hlutna awmna chu mawhphurhna hlenchhuahnaah a ni a tih theih ang.
Kan duh reng vang ni lovin, mihringa kan lo pian vang hrim hrim zawkin tihhlawhtlin tur mawhphurhna kan nei a.Tui taka kan muthilh lai emaw, tui vak lova kan mut lai te pawh hian chu'ng mawhphurhnate chuan min delh betin min uap reng a ni. Kan hlut lehzual nan ti hian inhan in ngaihtuah lawk i la..Eng hun nge ka tawng? Mi thinchhia nge ka nih a, mi zaidam? Enge ka tuizawng ni a, enge ka tih theihzawng? Pawisa hman sen loh khawpa nei mi hausa ka ni em? Ramhuai be mai mai nge ka nih a, Pathian nung betu? Eng kawngah nge ka ram leh hnam hian min mamawh?.....etc. tihte hi hriat chian a tul a. Chutianga mahni inhriat chian a,mahni hma lam kawng thlir thiam, mahni tihtur dik tak hmu fiah thei,mahni tih loh turah inrawlh lo mi nih chu a tul. Mahni inhre chiang lote chu mihring hlu an ni ngai lo.Puitling si naupang chhe awma awm, hlawhtling si lo hlawhtling thawka thaw, thiamna nei si lo mithiam lena leng, nei si lo nei awma awm,hre si lo hre ber anga insawi thinte hi mihring hlu an ni ngai lo va,mi hnawksak an ni zawk. Ni e, mahni hlu zual turin hun hmang teh ang.
EDITORIAL BOARD
Editor : Lalsangliana
Jt. Ed. : H. Remsanga
News Ed.: Zodinsanga
Cir. Manager:All Section Asst.Secy.& PC Lianmawia Keifangtlang
Manager: R.Lalchhuanawma
Manager: R.Lalchhuanawma
Post a Comment